«Հայաստան» դահլիճում կրկին իրարանցում էր. այս անգամ հավաքվել էինք` ամփոփելու հասարակական թիմերի նախորդ կիսամյակի աշխատանքները։ Իմացանք, թե ինչպիսի արդյունավետ աշխատանք են կատարել դպրոցի հասարակական գործունեության թիմերը` այբական միջոցառումների կազմակերպչական աշխատանքներում աջակցություն, էլեկտրոնային գրքերի շտեմարանի ստեղծում, սպորտային խաղերի անցկացում, բնապահպանական նախագծեր, այբական կյանքի լուսաբանում և լի՜քը այլ նախաձեռնություններ։ Թիմերի ներկայացուցիչները նաև պատմեցին, թե ինչ գործունեություն են իրականացնելու 2022-2023 ուսումնական տարվա երկրորդ կիսամյակում։ Ավագ դպրոցի բոլոր աշակերտներին մեկ անգամ ևս հնարավորություն տրվեց միանալու այն թիմին, որի աշխատանքները հետաքրքրում և համապատասխանում էին իրենց նախասիրություններին։
Հասարակական գործունեությունը «Այբ» միջին և ավագ դպրոցների աշակերտի
ուսումնառության պարտադիր և անբաժան մասն է, քանզի դպրոցի յուրաքանչյուր աշակերտ պետք է հանրօգուտ աշխատանք կատարի։ Եվ աշակերտների հասարակական կյանքը դպրոցում և դրանից դուրս կազմակերպելու նպատակով էլ դպրոցում գործում են հասարակական գործունեություն հետևյալ թիմերը`
- «Արագահաս» թիմ,
- գրադարանի թիմ,
- էկո թիմ,
- հյուրընկալ թիմ,
- մեդիա թիմ,
- միջոցառում կազմակերպող թիմ,
- մշակութային թիմ,
- սպորտային թիմ,
- պատմության ուսումնասիրման թիմ,
- փոխօգնության թիմ։
Բոլոր թիմերն այս կիսամյակի ընթացքում կիրականացնեն բազում հետաքրքիր և արդյունավետ նախագծեր, որոնք, իհարկե, կլուսաբանվեն մեր` մեդիա թիմի աշակերտներիս կողմից։
Անժելա Մաթևոսյան, 11-րդ դասարան
Կիսվել