Նոյեմբերի 15-16-ին կրտսեր դպրոցի տնօրեն Սիլվիա Յակուբյանը, միջին դպրոցի և համայնքի գծով տնօրեն Աննա Ակոպյանը, ավագ դպրոցի և ակադեմիական տնօրեն Մերի Հովսեփյանը մասնակցեցին 2025 թ. Համաշխարհային դպրոցների գագաթնաժողովին (World Schools Summit 2025)։ Գագաթնաժողովի նպատակը աշխարհի առաջատար ու նորարար դպրոցների ղեկավարներին հնարավորություն տալն էր միասին քննարկելու՝
- կրթության համաշխարհային մարտահրավերները,
- ուսուցման մեթոդների ու կառավարման նոր միտումները
- և այն լուծումները, որոնք կարող են նպաստել սովորողների հաջողությանը ժամանակակից աշխարհում։
Այն միավորել էր աշխարհի լավագույն դպրոցների շուրջ 500 ղեկավարների՝ կրթության ոլորտի առաջատար փորձին ծանոթանալու և գաղափարներ փոխանակելու նպատակով։
Այցի շրջանակում «Այբ» դպրոցի տնօրենները Սորբոնի համալսարանում հանդիպեցին «Այբ» դպրոցի այն յոթ շրջանավարտներին, որոնք այս տարի ընդունվել են Սորբոնի համալսարան և շարունակում են կրթությունը տարբեր մասնագիտություններով:
Տնօրեններն այցելեցին նաև Աբու Դաբիի երկու միջազգային դպրոց՝ Աբու Դաբիի ամերիկյան դպրոց և Աբու Դաբիի միջազգային դպրոց, և ծանոթացան դրանց կրթական միջավայրին ու կառավարման տարբեր մոտեցումներին։
Աշխատանքային այցը կարևոր հնարավորություն էր համադրելու միջազգային փորձը, գնահատելու տարբեր կրթական ծրագրերի լավագույն մոտեցումները և նոր գաղափարներով զինվելու՝ կրթության որակի բարելավման ու շարունակական զարգացման համար: